تاریخ انتشار : شنبه ۴ دی ۱۳۹۵ - ۱۹:۰۲
کد خبر : 3740

ایندی‌کی چاتدیم آلتمیشا…؟!

ایندی‌کی چاتدیم آلتمیشا…؟!

مهرتبریز: ایندی‌کی چاتدیم آلتمیشا…؟!به مناسبت۴ دی ماه سالروز تولد حمید آرش آزاد

مین اوچ‌یوز ایرمی یئددی‌ده گلدیم بو دونیایا
گلدیم اوْلام عؤمور بوْیو طنزایله همسایا

حتماً بوْروکراسی آز ایمیش من گله‌ن زمان
چون صبح اوْلدو، چکمه دی ایش‌لر گون‌اوْرتایا

منده‌ن قاباقکی قارداشیم اؤلموشدو اوّل ایل
نؤوبت منه چاتاندا، قوْیوب عزراییل مایا

چون افتخارلی اؤلکه‌ده دوْغموش آنام منی
دایم ایشیم گیر اوْلدو، باشیم دوشدو غوْوغایا

«کمبوجیه» گئدیب، اؤکوز اؤلدوردو مصرده
یوزمین‌ده قامچی ووردو «خشایارشا» دریایا

آنجاق‌کی، منده چون یوْخ‌ایدی عقل‌ایله شعور
وئردیم بؤیوک‌لرین باشا- باش زحمتین ضایا

اوْنلار خزانه‌لر تالاییب، اؤلکه‌لر آلیب
من ائتمی‌شم کاغیذ- قلمی ال‌ده سرمایا

اوْنلار قوْشون چکیب، دؤیوشوب شرق- غرب‌ایله
من ناخلف‌ ده‌گیرمی شم اوْنلارلا دعوایا

«آدم» بابام بهشتی ایکی بوغدایا ساتیب
من‌ده بو دونیانی ساتیرام ایندی آرپایا

القصّه، گلمی‌شم بئله دؤوراندا کئف چکه‌م
ال‌ده قاشیق، هجوم گتیره‌م گونده شوْربایا

وارسیل یئیه‌نده خاویاری، طاووسون دؤشون
من‌ده ائده‌م قوْناق اؤزومو بیر یومورتایا

گلدیم‌کی طنز‌ایله اوْیادام خلقی اویقودان
تا اویمویا داها کلکه، رنگه، حوْققایا

گلدیم ریاکارین آچام اوْوجون بو دونیادا
بیر ایش گؤره‌م‌کی، تیخدیغی بال دؤنسون ازوایا

حق چون آجی‌یدی، قاتدیم اوْنو دادلی طنزایله
درمان اوچون، اوْ زنجفیلی بوکدوم حلوایا

اکدیم گولوش گولون دوْداغیندا بو ائل‌لرین
ائل‌ده اوْ قدر لُطف ائله‌ییب، گلمه‌ز هئچ سایا

تورک «آرش» اوْلدوم، آتدیغیم اوْخ دگدی دوز خالا
هئچ یانمازام جانیم اوْلا قوربان بو سئودایا

print

برچسب ها :

ناموجود
ارسال نظر شما
مجموع نظرات : 0 در انتظار بررسی : 0 انتشار یافته : ۰
  • نظرات ارسال شده توسط شما، پس از تایید توسط مدیران سایت منتشر خواهد شد.
  • نظراتی که حاوی تهمت یا افترا باشد منتشر نخواهد شد.
  • نظراتی که به غیر از زبان فارسی یا غیر مرتبط با خبر باشد منتشر نخواهد شد.

مناقصات. گلدیس گلدیس آب